Անուշ անուրջով

Անուշ անուրջով պաճուճիր հոգիս
Նստիր մահճիս մոտ ու տխուր երգիր
Մոր պես քնքշաբար մոտեցիր դեմքիս
Խաղաղ փայփայիր սիրտս տարագիր
Լայն դաշտերի մեջ դանդաղ մշուշում
լքված լռության ծածկոցն է իջել
Իմ սիրտը հավետ կարոտն է մաշում
Տխուր իմ հոգում երգերն են ննջել
Երգիր ինձ համար, երգիր ինձ համար
Ինձ հեքիաթ ասա անրջանք բեր ինձ
Ցրիր քո երգով մռայլ ու համառ
Աշնան գիշերը իմ լքված սրտից